Xaba kubbaa miillaa..
Xaba kubbaa miillaa ..kan yeroo jabanaaa
Gurmuudhaan xabatuu..walin hinjifatu!
Bu’aa waliigalaa..sochii hundumaatii..
Kan isaa karra eguu… moorsaa ittisuu…
Kan gidduu miliqsuu ..hiriyaaf dabarsuu..
Naannoo dirree halgaatti kan kubbaa mirmirsuu..
Bu’aa hundumaatii ..sochii waliigalaa….
Xabni kubbaa miillaa!!!
Xabaa iddoo malee …Milla wal-sakaalee..
Keessatti as rukuta garasaa wallallee…
Dirree firaa gubbaatti waliisaa wal mormaa..
Eenyyuun hin jifachuuf walii waldorgomaa?!
Akkanaan hintaatu mo’ichi hin jirtu…
Ammam carraqxullee geeba hin fudhattu!
Qofaa ofii fiiguun dafqa xuruursanii
Xabataa michuu ofii ofduubatti dhiisanii!…
Achii as rukutuun kubba konkolaattuu…
Injifannoo hin taatu!!!
Gamanaa gamasii ijaan walilaaluun ..
Utuu hindubbatiin haalaan waliigaluun..
Akka qaama tokkootti wal duukaa socho’uun..
Jabeenya nyaapha ofii sirriitti madaaluun
Qaawwaa saaqqatanii keessa itti olseenuun
Akka hinmo’amnetti cufanii xabachuun
Yeros dandaa’amaa geebaf of-qopheessuun!
Seerri injifannoo erga akkas ta’ee..
Mo’uudhaan fudhachuun geeba isa qophaa’ee..
Akeeki inni guddaan erga lafa taa’ee
Kubbaa achi dhiitaa ofirraa fagaeessaa…
walli wal ilaalaa wal waliif dabarsaa
tokko yodogoggores dafaa wal sirreessaa
Keessa hin oliina dogoggora kaleessaa!
Fulduratti adeemaa gamatti qaxxamursaa!
Geeba nudhungachiisaa!!
QOPHEESSAAN
ADDISUU ADDUNYAA
