IYYAA! IYYAA! IYYAA!

I Y Y A A! I Y Y A A! I Y Y A A!

Namuu gama gamaa iyyee walitti labsee

Oromiyaa mara bakkayyuu wal geessee

Tokkummaan Oromoo diina shororkeessee

Gadaa keenyaa gahe duruu nuut callisee.

Tun tan duriin addaa sabnikoo onnatee

Roorroo bara meeqaa obsuu dadhabatee

Oromoon sossoo'e tokkummaan muratee

Kanaan itti fufnaan bilisummaan dhihaatte!

Jabaadhaa Oromoo akkas maleen taatuu

Oromoon goota sodaatteen dheessituu

Sabakoo falmadhu lubbuunis haabaatuu

Bilisummaan dhugaa akkas maleen dhuftuu!

Ka'aa wal kakaasaa gabrummaan ni gayaa

Magaalaaf baadiyyaan ilmaan Oromiyaa

Qabsotti bobbayaa hundi ilmaan aayyaa

Labsaa waliif dhaamaa,iyyaa! Iyyaa! iyyaa!

Namuu toora jiruu qabsoo haa itti fufuu

Hamma gabroomfataan aangorraa kufuu!

_______

Najiib Zannuun

Marsimoonaa@yahoo.com

OROMOONNI DIYAASPOORAA...!!!!

OROMOONNI DIYAASPOORAA....!!!!

Lubbuu qaalii diinni galaafachaa jiraa

Duuti isaaniis hedduu nama mararaa

Nuti warri biyya alaa maal gochaa jirra?

Akkamiin callifte Oromoon diyaaspooraa?

Barattoota nagayaa guddinaaf teessu,

Abdii boruu karatti yoo hambisu

Ayaa hegeree qaxara hoggaa cabsu,

Lubbuu isaanii diinni yeroo baasu,

Warri lafa alaa maalumaaf tatteessu?

Akkamiin dadhabdan addunyaatti labsuu?

Dhaabbiilee mirga namaaf falman,

Motummoota rakkoo teenya hubatan,

Miidiyaa dhimma keenya gabaasan,

Isaan biraan gahuu akkamiin dadhabdan?

Kanneen dhumaa jiran obboleeyyan keenyaa

Ijaanis agarree gurraanis dhageenyaa

Naasuu waliif dhabnee usnee maa tatteenya?

Duuti isaanii maaliif nun mararre?

Harka marannee maaliif callifnaree?

Hidhii ciniinnachuun humaa hinjijjiiruu

Bakka maraa ka'ee namuu haa hiriiru!

Iyya dhageessisaa addunyaatti himaa

Ka'aa wal kakaasaa nuutu waliif dhimmaa!

________

Najiib Zannuun

Marsimoonaa@yahoo.com

CAAM-BAATEE

WALALOO; Eebba Coqorsaa

GAAFA HANDARAAFAA

TUN JAALALAA MITI

FALMATAA ROORROO MAAL IRRA JIRA?

DHAAMSA ARTIST FALMATAA ROORROO.

Maqaanisaa kan dhalootaa Mahammad Muussaa Roobaati, maqaan ittiin beekkamu ammoo Falmataa Roorroo'ti.

Falmataan, Baha oromiyaa, ona Ituu, aanaa Mi'eessoo, anannoo ganda sheek hassan bakka jadhamutti dhalate. Akkuma nama kamiitti fayyaa guutuun dhalatuus, balaa akka tasaa isa mudatteen waggaa 7'ti qaroo ija isaa dhabe. Agartuun isaa tan hamileefi gammachuun lafaa ka'een san hanga xumuraatti waliin imaltee, harmee oromiyaa daawwachiiftee, suga gammachuu kan fooddaa ijaatiin seenee surrii sooru san hanga dhumaatti akka ifiin hadhaadhiyyu tan hayyamtuuf hin taane. 

Falmataa Roorroo bara 1982'ti gara oggummaa aartii seene. Albama isaa kan jalqabaa bara 1986 maxxansuun gurra ummata isaatiin gahe. Achirraa jalqabee osoo dadhabe, hifadhe hin ja'in aartii, afaaniifi seenaa saba isaa guddisuu qofa osoo hin taane qabsoo sabaatiif finiinsuuf kufee ka'aa as gahe. Addunyaa aartii keessattiis waan baayyee hojjatee, arraas hojjachaa jira. 

Wellisaa Falmataa Roorroo dhugumatti akkuma maqaa isaa qabsaawaa biiblee aartiitiin roorroo alagaa falmatu akka tahe himana caalaa hojiin isaa dhawwaayxee dubbatti. Dandeettii rabbiin badhaase kanaaniis albamoota baayyee baasee, sirboota qabsoo finiinsan hedduu hojjate. Walaloo barreessee, yadaloon qindeessee artistoota lafaa dhufan baayyeefiis kenneeti jira. Dhiiga dhala oromoo tahee kan Falmataa hin beeyne ni jira ja'ee hin tilmaamu. Yoo jiraatees dhageyaa didaa qofa.

Kan nama fayyisu rabbumaa ilmi namaa ni sababsata. Yoo yaalamee fayyuun dadhabamellee jala muree sabree taa'a. Garuu amma akkamitti qalbiin isaa tasgabbooyti mee? Yaa oroomoo, lammii tiyya duraanuu numaatu waliif qoricha, numaatu waliifiis riqichaa mitiiree? Jibriin wal gargaartee arba hiiti, ja'an abboottiin keenya.  Xiqqaafi guddaan keenyaa dhiiraaf dhalaan akkuma hooda keenyaa ammaan duraatti wellisaa keenya jaalatamaa, sabboonaa, qabsaawaa #Falmataa_Roorroo cinaa haa dhaabbannuu. Isiniin qaba jachaa jiraa, siif jirra haa jannuun. Kun dirqama walitti laachuu osoo hin taane waamicha oromumaati! 

Falmataa gargaaruuf:

Lakkoofsa akkawuntii (account number): Baankii Daldala Itoophiyaa (Commercial Bank of Ethiopia) acc. No: 1000140839907 kanaan gara akkawunt isaa erguu dandeessan.

Warri kallattiin gargaaruu barbaaddan ammo bilbilli isaanii: +251911835292

"Artist Falmataa Roorroo,

Dirmannaa sabaatiin rabbiin haa banuuf qaroo!"

http://youtu.be/_LHnQnGb_ow

GALATOOMAA.

HUBACHIISA:

Warri biyya alaa jirtan kan website gofundme.com irratti account banuufi dandeessan akka bantaniifi dhaamsa Falmataa hojiirra oolchan abdiin qaba.

#Saphaloo_Kadiir/ Abdulbasit

Sadaasa, 2015.

DIKTAATORA DAGGALAA!

Dictaatorri daggalaa
Bakka ciisuu alaan'alaa
Ifirraan garagaggalaa
Kan tuqe ija hamtuun laalaa
Isa maaltu godhe utubaa sibiilaa?

Gurran qabu afaan malee
Gadin bahu goda galee
Kanneen qaroo didee halee
Kan morame maqaa faalee
Kan jajjaboo keessaa haleelee
Kaayyoon isaa naaf hingalle!

Isa mormuun waa hin taatuu
Isa maddiin yoo olkaatu,
Isa diddee yoo falmattu,
Ni jibbamta ayaan taatuu
Sirraa mulqa maqaa keetuu
Si uggura matumattuu.

Usee taa'a ka'ee hin kakaasuu
Erga ciisee garaa kunuunsuu
Ofii beekee dhiibee achin siiysuu
Kan biraattis waa hindhiisuu
Hujiin isaa addaan faffacaasuu.

Tan harkaa qabu itti konyonyatee
Tan dhuunfaasaa fakkeeffatee
Rakkoo jirtu irraan tarkaanfatee
Ni dhufaadhaaf kan isa abdate,
Gaafa dhufu baruuf rakkatee
Gaafnisaa kun hedduu dheeratee
Dhuftisaa kun haalaan fagaatee
Dhiiroo gaafa Harreen gaafa baaftee?

Diktaatorri daggalaa alattuu akkanaa
Yoo maqaatii isuma yaammannaa
Shakkii fidee akkamiin amannaa?
Kan alattuu gochaansaa tanaa....
Akkam nu godha odoo seenee mana?

Rakkoon teenya itti hin mul'attuu
Madaa teenyaaf hinlaalatuu
Eefa garagalee waliin wal nyaatuu
Diina dhiisee waliin wal aloolaa
Itti abboomuuf iratti wal lolaa
Afaan wallaalle diktaatoora daggalaa!
__________________
Najiib Zannuun

NUUF BAHI YAA BIIFTUU

Yaa biiftuu yaa ifa ummataa

Dukkana maaf tahe

Carraan Oromootaa?

Ifnikee hangahee

Bakkayyuu wal gahee

Namayyuuf bahee

Addunyaa naannahee

Nutti maaltu tahee?

Ifnikee garayyuu hangayaa

Hundaahuu wal gayaa

Dukkana maaf tahe

carraan Oromiyaa?

Biiftuu... ormaaf baatee

Nurraa maaliif turtee?

Maaliif nu calliftee....

Dukkanatti nu dhiifte?

Dukkanaan haguugamnee

Ifa arguu feenee.....

Hawwiidhaan guutamnee

Maal balleessine?

Maal sitti yakkine?

Ifakee arguuf bara meeqa eeynee

Dukkana cillimiin eergarama mudannee

Gahe nuun jettee biiftuu maa hinbaane?

Yaa hangaatuu, yaa iftuu,sin baana yaa biiftuu

Yaa faaya uumamaa tan hunda mul'iftu,

Yaa tan ifa keetiin bobbaaftee galchitu,

Yaa tan uumaa Rabbii akkaan bareechitu,

Sabakoo Oromoof yoomuma kan baatu?

Rabbumaa siif kanne dandeettii atisii

Ifakee bareedaan mee nuuf walaqqisii

Wal arguu dadhabnee wal nu qunnamsiisii

Dharraa bara meeqaa dheebuu nu baasii

Addunyaa irratti nuuf bari'uukee labsii

Nuuf bahi yaa biiftuu golgolti nuuf geessii!

___________________

Najiib Zannuun
marsimoonaa@yahoo.com

https://www.oromiamedia.org/2015/08/omn-gaafi-fi-deebii-abdulsalaam-muktaar-barkallee/

Gootota

MIRRIGAA

WAANJOO GABRUMMAA...

MOOSINNI NI DABRA!

OMN

   OMN(Oromia Media Network) dhugaa ummata Oromoo tan dhokatte ifa baasuuf ummataan ummatumaaf erga dhaabbatee Waggaa bira achi taree jira. Jalqaba irraa kaasee hanga ammaattis dhugaa Oromoo tan dur dhokatte meeqaatu ifa nuuf bahe. Kan dur afaan qabamee dubbachuu dadhabe gama meediyaa kanaan meeqaatu hafuura baafate. Kun ta'ee osoo jiruu gufuulee hedduunis meediyaa kana gufufsiisuudhaaf tan deemaa turte baay'eetu qunname. Jajjallaan keenyas warreen guddinaa fi dhugaa Oromoo tan ifa baatuuf hin quudhine hedduu agarre. Milkaa'uu baatanis olola garaa-garaa irratti oofaa turan. 

Erga ololli OMN irratti oofamuu jalqabee OMN daran guddachumatti jira. Sanumaa as jijjiirama meeqaantam agarree irraa gammanne. Meediyaa tokkicha bu'aa-ba'ii meeqaan arganne kana akka inni laamsha'uuf namoonni xaaraa turan danuudha. Garuu humaatuu hin tarre. Mootummaa biyyattiitiin marsaa saddeetiif ugguramee ture. Haata'u garuu saddeettam ugguranis humaatuu hin goone. Qilleensarratti deebi'aatuma jira.

Gama mootummaa Wayyaaneen yeroo ugguramu warreen harka dhahaa turanii fi warreen akka sagaleen ummataa dhokattuuf yaalaa turanis humaa hin fidne. Bishaantu isaan jala yaa'e. Tattaaffii hojjattoota OMN,ummata Oromoo fi gargaarsa Rabbii wajjiin tasa hin gitintirre. Fuulduraafillee akka xiqqollee hin kushuufne abdiin qaba. 

OMN kan ummataan dhaabbatee fi kan ummataa waan ta'eef namni fedhe haala adeemsaa irratti yaada mataa isaa kennachuu mirga qaba. Haata'u garuu isa dhabamsiisuuf ifaajuun diinummaa ifa baate. Yoomiyyuu OMN sagalee keenya,afaan ummataati,daawwitii hawaasaati. Gama dandeenyu hundaan cinaa dhaabbachuun dirqama sabummaa bahuut nurraa eegama. 

__________

Najiib Zannuun

Baraat hammaate moo

Numaatu hammeessee?

Bara barri hammaatee

dubbiin gara galte,

Bara wanni hundi

faallaatti geeddaramte,

Hamileen duraanii

hundi qabbanooytee

Wanti jechaa turan

hundinuu hanqattee

Dubbiin duraaniitis

hundi qaqallattee,

Tan hamilte malee

tan biraan moo'amte.

Baraat jijjiirame moo

Maal ta'eeti namni?

Gowwaatu guungumaa

Ni dhabamee gamni?

Eessa nurraa kutte

Hamileen duraanii?

Hundi buburrooytee

Akka dur hin jirtuu

Tan duraan oowwituu

Hoggaa diilallooytu,

Sababni isaa maali

Maaliif hin qorattuu?

Maaltu nutti bu'e

Maa harka maranne?

Osoo galman gahin

Qaata dadhabannee?

Moo goluma keessaa

Namuutuu geerara?

Danta-dhaban taatuu

Dirqamaa nu jiraa

Furmaata barbaadaa

Dubbii keessa baraa!

Baraat hammaate moo

Numaatu hammeessee?

Nutti jabaatte moo

Maaltu nu laaffisee?

Onnee guutuudhaan

Onnachuu maa dhiise?

Dhiiroon callisinaa

Barbaadaa furmaata

Onnee dhabanillee

Sombaa nama dutaa.

......_______________

Najiib Zannuun/Marsimoonaa

Bofa afaa jalaa kan osoo hin beekin nama miidhu hedduu argaa jirra.

Najiib Zannuun irraa

     Waa'een saba keenyaa kun yeroo dubbatamu waan hedduutu nama ajaa'iba. Yeroo sabni keenya dammaqee wal dhagayuun sosossoo'ee gamtaan falmachaa jirutti, gufuun qabsoo teenyaa ammas numa keessa burraayxi. Bofa afaa jalaa kan osoo hin beekin nama miidhu hedduu argaa jirra. Isaannan kun warreen olola ciree,laaqanaa fi Irbaataaf qabuudha. Gama 'Facebook' kanaan maqaa meeqa moggaafatanii siree jalatti dhokatanii arrabsoo hojii kanneen godhatan baay'ee agarra. Hinaaftuu fi talfuuftuu gadda Oromootti gammaddee gammachuu Oromootti gadditu kanneentu nu rakke.  

Namoonniin irraa dubbachaa jiruu fi amma nu rakkaa jiru; warreen gosummaa fi gandummaan sammuun isaanii doomte, warreen dhugaan itti hin mul'anne, warreen niitii ifii bulfatuu hin dandeenye kan nama biyya bulchuun mormuu fi Warra ofii hin baratin kan nama baratee fi hayyuudhaan dorgoomu kanneeni. Silaas maal goona gaa isaannan akkanaa kanaa waliin miliyoona 40 lakkaawwannee. 

Beektoonni keenya kanneen qarooman, kanneen dhugaan saba isaaniitiif dhimmaman warra olola qallabaaf qaban kana bira dabranii jiran. Waan fedhan odeessaa oolanis isaaniif gurra osoo hin laatin hojii isaanii itti jiru; addaan dhaabanii hin beekan.

Namni dhugaan Oromoo ta'e,kan Oromummaan hidda isaa keessa jirtu,Oromoo diina hin godhatu. Olola qabsaa'ootaa fi sabboontoota ilmaan Oromoo saba isaaniif laalatan irratti oofuun isaanii ifaan-ifatti diinummaa isaanii mul'isa. Isaannan kun warra mataan osoo hin taane hud.......dhaan yaadaniidha. Yoo dhugaan kan Oromoo ta'an ta'e; olola oofuu, maqaa wal xureessuu fi hamilee walii cabsuu irraa hatattamaan dhaabbachuu qabu! Yoo kan Oromoof diina kan jedhan ta'e, moggatti if baasanii ifa bahuun haa dubbatanii. Nu keessa taa'aa, nu fakkaachaa nuun mormuu hin danda'an. Garuu waan fedhan jedhanis, lallabaa oolanis nuti wahitti isaan hin shalagnu. Xurii qeensa jalaa beektoota keenyaa hin gayan. Ofumaaf of rakku malee dubbiin isaanii funyoo udaan buute.

Xumura irratti,sabboontoonni Oromoo kanneen dhugaan saba keessaniif hadooddan Miila mataan mormuuf bakka hin kanninaa akkuma itti jirtanitti tarkaanfii keessan itti fufaan dhaamsa kiyya.

Galatoomaa!

Najiib Zannuun

Marsimoonaa@yahoo.com

NAMUU NUMA DU'A!

N͆A͆M͆U͆U͆ N͆U͆M͆A͆ D͆U͆'A͆!

Hunda hin hanqattu biyyeetu nyaataa

Hiyyeessas taanaan dureessa qabaataa

Gaafa guyyaan gahe biyyeen numa yaamtii

Du'a irraa hin oolu ilmi namaa marti!

Fedhanis jibbanis waanuman oolamnee

Didanis dhiisanis waan naman hanqanne

Dheeysitus jalaa numa hin baanee

Yeroo tantee geenyaan bira numan kunne.

Jiruu addunyaatti hangamillee turtu

Bashannantee raheessaas jiraattu

Mootii taatee biyyallee bulchitu,

Namutti wal qixaa tokko addan filtuu

Guyyaan kee geenyaan du'a jalaan baatu!

Lubbuu hunda dabareedhaan geessii

Aanga'ootas ta'e sheekotaa fi qeesii

Ilma namaa hundi faraqaa eeggannaa

Guyyuma wallaallee namuu numa duuna!

Warri qaroominaan bakka meeqa dhaqe

Warri qabeenyi onnee isaa tuttuqe

Du'a jalaa bahuuf xiqqollee hin yaallee

Duuti tan Rabbiitii waanuma hin oolamne!

____________________________

Najiib Zannuun

MUL'ATA DHUGOOME!

Hawwii bara dheeraa mul'atakoo cimaa

Tanin yaadaa ture ganna meeqaantama

Qashtii gitan qabne guuttamtuu waa hundaa

Takkittii too kuullee tan hin qabne mudaa

Isii argachuu koof an baay'een gammada!

Wal jaalachuu keenya garumatti qabannee

Anis hin gaafannee isiinis hin himannee

Osoo wal zigaalluu bara meeqa turree

Akka carraa ta'ee amma wal agarree.

Wal-fakkaattii lamaan kan walirraa deemu

Rakkoo fi bal'ina kan waliin dhandhamu

Gaddaa fi gammachuu kan waliif dhimmamu,

Isii argachuuf gammachuun koo hin dhumu!

Tanin abja'adheef bara meeqa guutuu

Tan jooree jaawwareef harkatti galfatuu

Waaqnis nan dhoorkanne isii anaan maltu,

Gammachuun koo dachaa Rabbiif haa galatu!

Tan dhugaan seente onnee tiyya keessa

Tan ijji too mil'atte ganama bariisaa

Tan keessa hin jirre jaalalti fakkeessaa

Akkaan onnee seentee hin qabdu bahiinsa!

Akkan an jaaladhutti tan ana jaalattu

Akkan an fedhutti tan ana feetu

Jaalalti nulachuu yoomiyyuu hin dhumtuu

Umrii dheerina Rabbiin nuuf haa laatu!

Nu lachuu gammannee lubbuun nu buxaaltee

Wajji habaqaallee duruu qaata saartee

Anis isii moo'een isiinis na mootee

Jaalala waliif qabnuutu isii hoongaa baate!

Jaalalti teenya,

Tan hin cabne tan hin dabne,

Tan hin daarre tan hin moofooyne,

Tan hin gooyne tan hin xoolooyne,

Tan hin cinne tan hin dhumne,

Tan hin jiiyne tan hin diigamne,

Tan hin burrooyne tan hin daalachooyne,

Gufuu fi gufaatii takka tan qunnamne,

Rabbiin nuuf haa godhu mootichi ol'aane!!!

❦❦❦❦❦❦❦❦❦❦❦❦❦❦❦❦❦❦

Najiib Zannuun